Mikołajek po śląsku. Geburtstag tatulka

Geburtstag tatulka
Mama padała mi wczoraj:
- Jutro tatulek mo geburstag. Zrobiymy mu kawał : bydymy udować, że my o tym durch zapomnieli, a na wieczór jak przidzie z roboty to bydzie mioł niespodzianka.
Toż dzisiej rano, tak jak mi mama przikozała, ani żech tacie nie powiynszowoł. Jak my siedzieli przi śniodaniu to tata tak choby nigdy nic zajrzoł na kalyndorz i padoł:
- Co my to dzisiaj momy za dziyń...? Och jak te lata lecom...
Potym się jeszcze spytoł mamy czy ni mo czego szczególnego do załatwiynio w tym dniu, a ona padała, że se nie przipomino i czy mo mu doloć kawy. Tata wartko stanył, dupom potrzepoł i padoł, że już idzie bo się fest śpiycho. I poszoł.
Och, na wieczór to się tata zdziwi jak ujrzi, że my jednak o jego geburstagu nie zapomnieli.
Potym mama pokozała mi prezynt jaki kupiyła tacie – piykny binder. Żółty w różowe kwiotki. Mama dycko kupuje tatulkowi bindry, ale on ich prawie nigdy nie oblyko. Som tak piykne, że na pewno się staro, że jak w nich bydzie chodziył to ich umarasi.
Zbliżoł się wieczór. Prziszła już cało familijo. Zdonżył też dojechać od tatulka szef – panoczek Bynek . To je taki niski chruby łysawy chłop z czeronom gymbom.
Pogasiyli my wszystki światła w chałupie. Tatulek otwar dźwiyrze i wloz do antryju. Już żech haja wyczuwoł na kilometer boch słyszoł jak fuczy. Z radości to on nie skokoł.
- Tyn stary wredny bachraty wieprz se postawiył auto przed naszym płotym. Piyniyndzy pełno rzić a ni mo swojigo garażu? - ryczoł tatulek choby wściekły.
Mama zajrzała w strona wielki izby, zrobiyła sie modro na gymbie i wyglondała na fest znerwowano.
- Cicho chopeczku, wiysz... panoczek Bynek...
- Ty mi już o tym bachroczu nie przypominej – wyrczoł tatulek.
Łoroz szef wyloz z wielki izby z zawieszonym nosym. W rynce trzimoł flaszka szampana.
- Ty se zapamiyntej – zajrzoła bykiym na tatulka- jo żech ni ma wcale bachraty. Biera se ta flaszka, a ty se mogesz jutro rano prziś po swoja niespodzianka do mojigo biura.
Tatulek mioł tak szyroko gymba otwarto , żech go piyrszy roz takigo widzioł.
Mama już nie padała ani słowa yno zaroz poszła z bekiym do sypialki.
No i patrzcie... Jo już teraz nic nie rozumia. Niespodzianka miała cało familijo, a dyć to yno tatulek mioł geburstag.