Pultoki

Nasza starka mo bez lato geburstag. Mamulki i tatulka jeszcze z roboty nie było, a Helka mie tak prosiła żeby my już szli sami, żech się doł w końcu namówić. Łoblykła se wartko tyn nowy czerwony klajd, co miała w nim iś za dwa tydnie do ciotki na weseli. Rozpuściyła se włosy, a na nogach miała te nowe szczewiczki na takim małym kromfleku. Jak jom starka ujrzała to aż ji oczy wylazły i godo:
-Żebyś ty się dziołcho yno nie uciaprała, boś je piykno choby królewna.
Zjedli my u starki konsek dorty i kołocza ze syrym i Helka z tym Hanyskiym od ciotki zarozki na dwór wyrwała. A tyn Hanysek to je ogromny gizd. Łon wcale po schodach nie ślazowoł yno fuk na gelynder i już był na dole. Helce nie trzabyło dwa razy godać. Przeca jak Hanysek jedzie to łona nie bydzie piechty na dół cisła.Fuuuuch i już była na dole. Tela że krauska z tego nowego klajda została wisieć na gelyndrze. Niż starka prziszła to dziecek już downo nie było. Hanysek wskoczył prosto do zegrodki ku pultokom a moja wrazidlato Helka za nim. Jak jom pultoki ujrzały, jak te piórka postawiyły... I prosto do ni, szarpiom za to co jeszcze z tego klajda zostało. Jak już Helka ryczała na pół wsi to starka zdążyła dolecieć i jom wyratowała:
- Dziołcha, po co żeś tam lazła?? Przeca pultoki nie ciyrpiom czerwonego koloru. Dyć Hanysek, tyn gizd jedyn o tym dobrze wiedzioł .
Starka wziona Helki do dom, oblykła jom w jakiś insze lonty i cały czas powtorzała , że jak mamulka to ujrzi to nom łeb ukrynci .
I co? I zaś sie oczywiście mie za wszystko dostało. Mamulka kupiyła Helce nowy czerwony klajd a jo za kara żech Helki nie uwachowoł , musioł iś na weseli w starym ancugu.