Zadani domowe

Nazywom się Milka. Mom 6 lot i chodza do piyrszej klasy. Piyrszej A. Uczy mie pani Rynia. To je tako fajno baba kiero się nigdy nie nerwuje.
Joch se padała : czytać już poradza, rachować też, to jo sie w tej szkole byda miała jak krepel w maśle. Styknie, że się wystroja, zrobia se frizura i byda siedzieć i woniać.
Żodyn mi yno nie padoł, że tam je coś takigo jak zadani domowe...
Piyrszy roz o zadaniu zapomniałach jak było J jak jajco. Zaglondom do zeszyta: cztyry linijki, w ćwiczyniach ta wielko strona i se myśla... No ludzie kochani, jak jo ku tymu teraz siedna, to skończa jak bydzie wieczerzo.
Pozawiyrałach te hefty, wciepłach do tasze i chyciyłach się kolorowanio.
Rano zawsze czekom 15 minut na świytlicy, a że tam nie było żodnej moji koleżanki toch se wartko te zadani zrobiyła . Trocha te j było koślawe, ale w 15 minut zdonżyłach.
Dostałach za to od pani Rynie piykno pieczontka z takim uśmiychniyntym pycholkiym a pod niom pisało : WSPANIALE.
Przi literce sy już nie było tak leko. Tela już tych liter znomy, że do dom były dwie strony całych zdań, kartka z matymatyki i dwa łobrozki z religie do pokolorowanio.... No luuuuuuuudze złoci! Jo sie przeca nie rozerwia! Jo mom jeszcze inno robota w doma! Zaś żech na wieczór tasza spakowała i poszłach spać.
Rano cima. Jo se leża pod takom cieplutkom kołderkom a łoroz mi mama buczy nad uchym. Milka! Ty lyniu jedyn! Tyś wlazła do łóżka, a żeś żodnymu nie padała że mosz tela zadanio !!!
A jo tak na nia zaglondom jednym łokiym bo mie lampa ślepiyła i godom: Dyć sie mie żodyn nie pytoł.
Wylazłach z tego łożka, połowa zadanio zrobiyłach i trzabyło iś do szkoły. Przijechali my na styk, toch już na świetlica nie szła yno zaroz do sale.
Za zadani dostałach pieczątka z takim wykrzywionym pycholkiym i napisym :POSTAREJ SIE!
I tak se myśla... Dyć to je prawie to samo co : nie starej się...
No to sie nie starom, ale o zadaniu już nie zapominom.